垃圾桶文章*

你覺得敷Mask對皮膚有幫助嗎？

其實我覺得無乜。

對我嚟講，敷Mask只係一種姿態，

話俾自己聽：你要relax relax relax relax。（如果唔係會有皺紋）

好啦，今日太多嘢發生，

個腦仲係度轉緊，

所以我而家敷緊Mask，

催眠自己：你要放鬆放鬆放鬆．．．

點解今日我覺得過得好快，

又好似好慢咁。

朝早番工嘅時候，

我行得好慢，

因為琴晚瞓瞓下覺，

隻左腳突然抽筋，

痛到大叫一聲，

醒左10分鐘再瞓過。

仲要一路瞓，一路唔敢郁，

一路擔心佢又再抽筋。

番到公司，見到枱面個to-do-list，

我突然心跳加速，

死啦死啦死啦，

自己同自己講咗10萬次。

好似好多嘢要做，

又唔知由邊度做起。

我覺得自己好變態，

係好多嘢做嘅時候，

第一件想做嘅嘢，

竟然係重新寫過一張to-do-list．．．

係照抄一次！！！

點解我要咁做？！OTZ

喺好忙嘅時候，

搵左都係好忙嘅戰友，

一齊為忙碌祈禱。

感激感激。T_T

祈完之後，我好似突然失憶，

唔記得咗自己其實好忙，

反而輕鬆咗。呵呵呵。

交咗一條稿。

總好過冇。

（之後仲有幾多條，

我都講唔到。）

有一個未來旅程嘅細節，

交咗俾大佬處理，

太好了。

而家自動波進行中，

可以先放埋一邊。

（我係懶散嘅員工）

夜晚見咗25個老師，

有人聽聽下分享瞓左，

有人全程金睛火眼抄notes，

大開眼界。

感恩，有好多老師願意援助100人訪問，

之後幾期都有著落。

「你地好有心，但啲內容真係有啲深。」美女老師話。

我會記住，再諗諗。

（唔知點解好想令篇文押韻）

其實，諗落今日都係好感恩。

無驚無險。

一日完成一項工作。

咁一日總會比一日有盼望。

明天會更好。

無事嘅，實搞得掂嘅。

OOSH～～～～～～～！

噢，要執書包，

聽日8:30am要去到佐敦呀！！！

（咦？不如食澳洲牛奶公司做早餐啦！

突然好期待呀～～～～>O<）

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

*垃圾桶文：
腦子裏有太多的東西，

要抛出來，丟在垃圾桶，

那麼就嘔在Blog裏吧。

失禮了失禮了。