無言

終於也來到周末，但預見未來三天都很忙，
很想把腦袋放空一下，於是到了漫畫店借漫畫。

當我在找搞笑無聊漫畫時，店內收音機傳來李慧玲的聲音，
不知道是跟誰在討論「林瑞麟有沒有機會落台」。

然後，在櫃台那邊傳來一些討論。

「你聽日會唔會上街呀？」漫畫店長問。

「吓？」一名瘦小，曲髮的女顧客答。

「我怕你聽日上街唔得閒睇，還唔切呀嘛。哈哈哈。」 店長說。

「唏，我點會上街喎，班人傻架，又唔知佢地會搞啲咩事出嚟。」她說。

「係囉，都唔明點解而家啲人咁激，成日都推推撞撞，
啲警察都係因為你地搞事先要做咁多嘢，啲警察行埋啲就即刻瞓低係地下，扮晒嘢，
明明係自己唔啱，仲要扮係受害者。」店長開始激動。

「其實以前啲遊行都唔會咁，都淨係遊行之嘛。」顧客說。

「咪係，越嚟越過分，如果唔係呢班人搞風搞雨，個社會咪無咁亂咯。之前，嗰個陳偉業，仲話咩如果周一嶽出嚟見個示威者，個警察就唔會死，係咪太過分呀。個班人都係咁，乜都瀨一餐。」店長超激動。

「我都覺得個政府唔啱，都會有嘢想同政府講，但係我唔想同陳偉業、長毛嗰班人一齊上街囉。俾人影到，人哋會話『嘩，乜你同佢地一樣架』，咁幾樣衰呀！」顧客七情上面地說。

「梗係啦，同埋都唔知會唔會俾佢地連累，到時連你都拉埋就慘啦。」店長一錘定音。

「 我唔會去啦，放假抖下，睇下書咪幾好。」顧客說，然後揮手拜拜。



＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

我估，這就是許多明天選擇無視這場遊行／這個「替補」爭論，
馬照跑、舞照跳的人的心聲吧。

 唔．．．我一邊離開漫畫店，一邊很想澄清（只是沒膽、也沒力氣）：

1) 其實，我們真的沒激動。

2) 插水，其實兩邊（警察和示威者）都有做。
但最插水／最搞事的，是那班只會播放10分鐘衝突，卻不會提及數小時和平遊行的傳媒。

3) 我不嬲都係諗住淨遊行。最多吹牧童笛。我身邊認識的人都打算這樣做。
我諗大多數人都係咁諗。

4) 我同意陳偉業為了見報，在警長殉職的悲劇上抽了水，很不要得。你的氣憤我理解。

5) 請留意，政府現在也是在抽水，抽晒全港700萬人的水－－麻煩你也理解一下我的氣憤。無論是想要叫星州炒米、西班牙炒飯，還是打算禁食的，它都迫你要吞掉這隻死貓．．．你忍到咩？我忍唔到。

6)  我知道明天遊行隊伍中，會有自己不認同的人；也或許真的會被歸類，成為「滋事分子」。但，我不覺得自己的面子竟然會重要過社會法治。