遠啲好咗

最近和猴子的關係幾好。

——唔，要收埋我個critical self先——

其實係好好！

詳細的原因，我都唔太知道，
但似乎空間真的好重要。

原來空間並不只是提供一個距離，
而是要提供一個可以做自己的可能。

即係例如一個比較大的廚房，
讓他和我都可以煮飯。
而他，其實是幾中意煮飯的。

又例如是有一個大家都可以安靜地睇下書、睇下ＮＢＡ，
而又不用怕搞到對方的床呀、梳化呀或者書枱。

當做番自己，無緊張兮兮，就好似容易啲欣賞到對方為自己做的事。

容易啲感受到被愛，又容易啲付出。
好開心。是快樂的循環。

＿＿＿＿＿＿＿＿＿＿＿＿＿＿＿＿＿＿＿＿＿＿＿

成日都有人問：搬咗咪好遠囉？

係啊，但老老實實，我又無覺得唔開心或者好累呀，咁樣。

但又唔知點樣答：「我幾中意坐長途車。」（又好似唔係，因為我唔想去港島返工。）
「我大把時間。」（更加唔係，因為返到屋企食埋飯，有時都10點。)

如果要，我會認真答：
「我幾享受慢慢番工，可以warm up下先，有時會在車程祈禱。咁樣一番到埋位就開得工。」

今日再睇紫色書，又好似明白多少少。

大概是我要學習默觀的，是當面對天天的工作和生活，
在每一個抉擇前，都嘗試學會放手，
接受上帝才是主權和拯救者。

隨生命的道而流。

而這個練習現在是每天早上都在做。

我大概什麼時候出門，我可以控制。
但那些巴士和小巴什麼時候來、有沒有按班次，卻不是我能決定。
只有把握當下，等待的時候睇幾頁書、打幾舖機、發一陣呆。

活在當下的恩典是每個人都要學的，而我的功課，是放棄控制。

我估對於好多人來說，這個早上等車的功課應該好容易吧。（篤手指）
（個Critical self 又出來)

唔，我覺得搬咗來八鄉之後是容易咗的。

但之前在深水埗，就好唔同。
好難，每一日都係靠自己奔跑似的去上班。

而家搭車，慢就慢，塞就塞，其實都控制不了。
祈下禱、睇下書，又可以。
每天早上有這個「序幕」，會經常提醒自己，
我可以放手，生命的主會載我到站的。

＿＿＿＿＿＿＿＿＿＿＿＿＿＿＿＿＿＿＿＿＿＿＿＿

不過，最近心跳加速的情況還是沒有改善。

到底是心理作用，還是身體問題呢？